USA, here I come!

Då er det snart tid for avreise! 4.-24. juni fyk eg faktisk til USA, for å vimse litt omkring på vestkysten og ørkenstatane.

Via Oslo og München flyg vi til Los Angeles, der vi (Nils-Ove, Stig, Jeanette, Martin, Kristine) skal leige eit hus vel ei vekes tid. Detaljane får vi ta etter kvart, men for min del er i alle fall ein tur innom West Angeles Church of God in Christ obligatorisk. Åtte år sidan sist, men gode minne frå søsne gospelbestemødre på første rad forsvinn aldri. Kanskje klarer eg også å få tak i nokre sunnmørske Hollywood-fruer som eg kan intervjue?

Etter kvart kjem Jonas snikande frå Brasil, så leiger heile gjengen ein feit bil og rånar inn i ørkenen. Med litt flaks skal vi finne fram til Las Vegas, byen med billige hotell og pengeslukande casino. Forhåpentlegvis er det meir å finne på der enn gambling, eting og å gifte seg.

Frå Vegas går bilturen sørover mot Phoenix i Arizona. På vegen stikk vi kanskje innom Hoover Dam og Grand Canyon, men det er i alle fall i området rundt Phoenix at vi skal ende opp til slutt. Her skal nemleg Eirik og Coral seie ja til kvarandre og eg skal ta bilde av at dei kliner.

Vermeldingane er forresten ikkje spesielt positive. Heldigvis er det ganske kjølig i LA, med 22-28 grader i vente framover. Men i Las Vegas varierer dei daglege makstemperaturane frå 27 til 40 for tida, og i Phoenix skal det visst vere 34-40 grader den komande veka...

Wish me good luck!

Groundhopping på Sunnmøre

Livet som frilansjournalist er variabelt. Nokre dagar er det mykje å gjere, andre dagar er det lite å gjere. Nokre dagar burde eg ha gjort mykje, men får gjort lite. Men det er i alle fall mykje fotball på timeplanen for tida:

Torsdag 6. mai: Vigra-Ørsta på Rota gras (4. divisjon, Øy-Blikk)

Fredag 7. mai: Godøy-Herd på Godøy gras (3. divisjon, Øy-Blikk og Sunnmørsposten)

Søndag 9. mai: AaFK-Odd på Color Line Stadion (eliteserien, ANB)

Tysdag 11. mai: Norborg-Godøy på Uggedal kunstgras (sjuarkamp, må spele litt sjølv også!)

Torsdag 13. mai: Volda-AaFK på Volda kunstgras (cupkamp, ANB)

Fredag 14. mai: Valder-Godøy på Valdervoll kunstgras (3. divisjon, Øy-Blikk)

Søndag 16. mai: Giske-Stranda 2 på Giskebana gras (5. divisjon, Øy-Blikk)

Sju sunnmørske baner på elleve dagar - nokon betre? Eg kunne sett Giske-HaNo onsdag 12. mai også, men sidan eg skal på Giske 16. mai, vurderer eg å ta fotballfri på onsdagskvelden. Eller var det då Fulham skulle spele finale i Europa League?

Med fotballtrening begge laurdagane vert det då berre fotballfri i dag - måndag 10. mai 2010. Og kva gjer eg no? Skriv om fotball. Men eg er ikkje fotballidiot, berre idiot :)

Tottenham til Champions League!

Den store dugnadsdagen

Laurdag 24. april var visst den store dugnadsdagen på Godøya våren 2010. Sjølv starta eg dagen med å trakke/planere idiotiske hjulspor på grasbana til Godøy IL.

Forhåpentlegvis skal bana vere sånn passeleg flat til dei første heimekampane neste veke...

På bedehuset var det vaskedugnad, eg skal ikkje skryte på meg å ha gjort så veldig mykje der. Men eg tok i alle fall av meg dei moldete skoa då eg skulle inn med litt musikkutstyr, så det vart i alle fall ikkje skitnare etter mine tre minutt innom den dugnaden!

Så var det den o store Støbakk-dugnaden, med Christian og diverse onklar i hovudrollene. Eg fekk også leika litt bygningsmann i eit par timar, med vatring og blyantstreking som min store spesialitet, i tillegg til å vere ein glimrande plankehaldar i sagavdelinga.

Pompel og Pilt - eller Nils Ottar og Christian, om du vil.

Besta skal få ny hybel i kjellaren - omtrent slik skal inngangspartiet sjå ut. Ketil og Jan tok seg av arbeidet i høgda.

Også Mats ville hjelpe til litt.

Til og med barndomsheimen min er i endring. Mamma er i ferd med å fjerne tapeten på stua, snart skal ho ha seg nytt kjøkken og greier!

"The white arch" - avskilta etter 26 års teneste...

Dyrisk bra mål

Ikkje alle kan vinne...

Må berre legge ut ein filmsnutt Kay Amund anbefalte. Nokre gonger kan det vere lurast å berre bite tennene saman og gjere det beste ut av situasjonen...hehe :)

God påske!

Nemi har forstått det...eller i alle fall nesten!

(trykk på bildet for større versjon før du les vidare...)

Heldigvis er det ikkje heilt feil med hyttetur, skiturar og frysing på fjellet - men det er Jesus som er det viktigaste i påska. Det er han vi bør feire, det er han som gjer at vi burde vere glade. Og takknemlege.

"Men han vart såra for våre brot, knust for våre synder. Straffa låg på han, så vi skulle ha fred, og ved hans sår har vi fått lækjedom."
(Jesaja 53:5)

Takk til Jesus. Og litt til Nemi også, for ei viktig påminning i starten av høgtida :)

Nils-Ove sine beste tips til ei god påske:

1. Nattverdsmøte på Godøy bedehus, skjærtorsdag klokka 19.30.

2. Påskemøte i Ålesund bedehus. Spesielt langfredag, då går det rykte om at nokre flotte folk frå Godøya skal spele og synge.

3. Påskefrukost 11.00 og møte 12.00 på Godøy bedehus 1. påskedag. Eg skal feire i fengselet, men alle andre bør stikke på påskefrukostfestivalen!

4. Johannes-evangeliet kapittel 20.

Tour de Kebab

I slutten av februar 2010 fann Nils-Ove Støbakk ut at det var på tide med litt kebab. Dermed gjekk turen til Oslo for å plage kjentfolk og liknande.

Med god hjelp frå ein flott mobiltelefon, vart det meste av turen (minus Ikea-shopping og kjendisstatus på Golden Goal-innspeling) dokumentert og lagt ut på Facebook.

Trykk her for å sjå alle dei fantastiske bilda frå ein passe sløv og mettande tur til Oslo og omegn.

Still In Control

Då har eg akkurat sett Norge tape 8-0 mot Canada i ishockey, tidlegare i kveld vart det fiasko i både skiskyting og boardercross. Går det mot nok ein OL-fiasko for Norge? Skal det bli null gull, som i Calgary i 1988? Kan svenskane ydmyke oss meir og meir, dag for dag?

For å vere heilt ærleg, klarer eg ikkje hisse meg så veldig opp over skuffande idrettsprestasjonar. Livet går vidare, heldigvis er det mange viktigare ting enn OL - sjølv om det innimellom kan vere både sosialt og god underhaldning.

Det er (dessverre) mange større problem her i verda enn manglande OL-gull. Jordskjelv, krig, togulykker, personlege problem i mange ulike kategoriar. Då er det godt å minne kvarandre på det som Kirk Franklin syng i "Still (In Control)":

He's still in control
He's soverign and He knows
Just how it feels to be afraid
Have folk you love walk away
Be still and know He's still in control

Enten livet er på topp eller heilt på trynet, så er Gud den same. Dag eller natt, aldri forlatt!

Så får vi sjå om vert OL-gull på sikt, for min eigen del er konsert og fotballtrening førsteprioritet onsdag kveld, så kan eg heller vurdere TV-kveld torsdag. Fredag til søndag er det skiweekend på Bjorli med Godøy Ungdomskor, før eg stikk til Oslo nokre dagar for å ete kebab, kjøpe ei hylle på Ikea og treffe kjekke folk :)

Ei tid for alt...

Då er FC Kørv historie, etter 5 1/2 år som det beste Alnes-inspirerte laget i managerspelet Hattrick.

---

Fra: no-reply@hattrick.org [mailto:no-reply@hattrick.org]
Sendt: 15. februar 2010 01:02
Emne: Hattrick - Your account is deleted

Your team has been deleted.

A while ago you were warned that your team in Hattrick had been inactive for too long. Since you still haven't logged in, the team has now been deleted. We've done this because we want to make room for people who really want to play Hattrick.

Anyway, we hope that you had some fun while it lasted! Maybe we'll see each other again sometime.

Best regards,

The Hattrick Team
http://www.hattrick.org