Kali méra, Kreta!

Kva gjer du når du har jobba altfor mykje heile sommaren, har berre ei veke ferie igjen og ingen andre kan bli med på sydentur? Reiser til Kreta åleine, så klart!

Laurdag klokka 13:58. Eg er inne på nettet, finn ein OK restplass frå Apollo og bestiller.

Søndag klokka 19:38. Flyet lettar frå Vigra, fire og ein halv time seinare er eg framme på flyplassen i Heraklion. Utpå natta ein gong er eg framme på rommet mitt, om lag sju kilometer aust for Rethymnon.

Så langt har eg mellom anna leigd scooter (som eg skal ha heile veka), ete gyros, kika litt på stranda, lest ei knallgod Max Lucado-bok, sløva på altanen min og funne ein sportsbar slik at eg veit kvar eg skal vere under Chelsea-Tottenham på laurdag.

Heldigvis fekk eg leilighet og ikkje hotellrom, dermed har eg både kjøleskap og kokeplate og kan lage skikkeleg frukost. Takka vere Lidl, Spar og den lokale småbutikken har eg både oppvaskmiddel, eingongsbestikk, egg, pølser, bønner, skinke, ost og alt anna som ein ferierande slask kan tenkje seg når han vaknar ein eller anna gong utpå dagen.

Dei neste dagane skal eg kanskje bade litt, kanskje utforske området på scooter, kanskje dykke?

Spennande å sjå, vi får ta ein dag om gongen og håpe at Godøy klarer å knuse Valder på fredag - sjølv om ikkje eg er der...